||खेलुक मिरती ता फेरे....||

घाम-बरसा-सीत खादली,
पोसली आमके चार महू-टोरा ने.
खेलुक मिरती ता फेरे मके,
मचो माय चो कोरा ने.

गेली केबय केसुर कांदा,
पीता काँदा कोड़ुक.
बुलली खमन ने,
सरगी-टेमरु पान टोड़ुक.
पीला-पीचका चो सुक काजे,
हिंडली बाटे -बाटे.
बिकली केबय धूप केबय,
पान-दतुन जाउन हाटे.

केबय केरा बिकुक नीली,
मुंडे बोहुन बोरा ने.
खेलुक मिरती ता फेरे मके,
मचो माय चो कोरा ने.

आमचो काजे आउर घरे,
आया करलिस बुता.
पड़उक लिखउक आमके,
आपलो बिकुन दिली सुता.
नी घेने आपलो काजे,
केबय नुआ लुगा.
घेनु देउआय आमचो काजे,
मोटोर गाड़ी फुगा.

हाट ले चना-चरबन आनुआय,
भरुन आपलो झोरा ने.
खेलुक मिरती ता फेरे मके,
मचो माय चो कोरा ने.

✍अशोक नेताम "बस्तरिया"