||पूनी दिन||

कारतिक मइना,
काय मंजा पूनी दिन.
उदलिसे पंडरी जोन उपरे.
अरु घसरायसे मंजपुर ने,
चांदी असन छकछका उजुर.
उजुर ने सब दखा दयेसे.
अमली-आमा,सींद-सलफी,
बाँवोस-सिवना,महू-सरगी.
जमाय ठीया आसत,ओग्गाय.
होलासत बे हरिक आज,
रसया उजुर ने नहाउन.
नंदी-तरई चो पानी ने बले,
लहर संग नाचेसे जोन सुँदरी.
सीतकार चो बेरा.
लोग बसलासत कोठार ने,
मंजी आइग के धरउन.
उचलासत जोंधरा,
गोटयासत सुक-दुक चो गोट के.
सुरता करसत आगे बेरा चो.
पूरे चो गोटुल चो.
पूरे चो सियान मन चो कीरति चो.
पूरे चो धरम अरु सतजुग चो.
बलसत बेर-जोन तो केबय नी पलटला.
मान्तर मनुक आज कितरो पलटलो.

✍अशोक नेताम "बस्तरिया"