वहू अदमी,तहूँ अदमी,
नइ हे कोनो अंतर.
कुछु नइ मिलय बिन मेहनत के,
मारले कतको मंतर.
सबके तन म,
एके खून बोहाथे.
जिनगी म सबके,
दुख अउ पीरा अथे.
झन समझ तैं,
आपन आप ल डेड़ हुसियार.
बना बेवहार ला सुघ्घर,
जइसे होथे मीठ,खुसियार.
का चीज के गरब करथस बाबू,
तोर जइसे अइन-जइन कतको हजार.
समय के कीम्मत ल समझ,
बगरा चारो कोती मया-दुलार.
सत के रद्दा रेंगे बर,
तैं जादा झन सोच.
हो जही जिनगी तोर सारथक,
कोनो गरीब दुखी के आँसू पोंछ.
ए भरम के चसमा ल,
तैं उतार के फेंक.
सब तो अपनेच आँय जी,
मन के आँखि खोल के तो देख.
हौ हाँसही तोर उपर ए दुनिया,
तोला पगला-दिवाना कही.
फेर एक न एक दिन,
अम्मर जग म,तोर नाव रही.
✍अशोक नेताम"बस्तरिया"
कोण्डागाँव(छत्तीसगढ़)
कोई टिप्पणी नहीं:
एक टिप्पणी भेजें