जब ले वाट्सेप अउ फेस बुक आय हे न,तब ले सूचना के छेत्र म जइसे करांति आ गेय हे.का लइका,का सियान. जम्मोझन जइसे पगला गे हवँय.नान्हे से लेके बड़े खबर घलो एक-दूसर तक अत्तिक जलदी फइल जथे जइसे कि जंगल म आगि फइल जथे.
आय दिन खभर मिलत रहिथे कि फलाना के लइका,बेटी नही ते डैकी गँवा गेय,फलाना नम्बर म संपर्क करो.
अभ्भी पाँच मिनट पहिली रइपुर रद्दा म फटफटी अउ टरक के टक्कर होगे-गाड़ी ह चुर्रुस ले होगे अउ अदमी मन घलौ पिचका गें,देखव ओखर लाइव फोटो अउ विडियो.
काखरो आधार कार्ड,ए टी एम,अंकसूची वाला बेग मेरे को मिला है,मेरे नंबर म फोन लगाओ.
गँवालो मनखे मिल जथे,एक्सीडेंट के खबर पुराना हो जथे फेर अइसन खबर ह,सालों साल फेस बुक-वाट्सएप म चलत रहिथे.
कइ झन विडियो डाले रहिथें "देखो ये रोगहा-कमीना अदमी अपने बाई को किस बेरहमी से लउठी से मार रहा है?क्या इही इनसानियत है?"
नहीं ते"ये देखो ये अदमी एक्सीडेन्ट होके सड़क म कइसे तड़प रहा है.लोग एला देख के घलो अनजान बनके निकल जा रहे हैं."
अरे मोर बाप!जब तें अत्तिक दया-मया वाले अस,त तँय ऊँखर मदत नी कर सकत रेहे का?तें बस मोबइल म फोटो खींचे अउ विडियोच बनाय बर उँहाँ खड़े रहे.अउ अब दुनिया ल तमासा दिखात हस.
एक दिन मे एक ठिन दुकान ले जाके घर वापस आएँव.घर म मोला उल्टी-चक्कर चालू हो गे.मोर बाई परिस्सान.पूछिस का-"खा-पी के आय हस जी?"
में केहेंव-"मोर एक झन संगवारी ह कोकाकोला पियाय रिहिस."
बाई भड़क गेय"आप मन ल अत्तिक घलौ नालेज नइ हे.में अभ्भीच वाट्सएप म पढ़े हँव,कि फन्नस खाय के बाद कोकाकोला पिए म मनखे के मउत तको हो सकथे.में तुरते धरती म गिर गेंव,अउ तुरतेच मोर परान निकल गे.
एक दिन कथँय कि अंडा खाके केरा खाना जानलेवा हे,फेर दूसर दिन कइथें नहीं काली के खभर गलत था.अंडा खाय के बाद केरा खाओ कुछु नहीं होगा.
का ल पतियाबे अउ कते ल झूठ मानबे रे भइ.
वाट्सेप फेसबुक म एक परकार के अउ मेसेज अाथ रइथे आपको आपके दाई-बाप की कसम.इस खभर को अभ्भी 10 लोगों को भेजो अउ 5 मिनट म चमत्कार देखो.किसमत खुल जाएगा,धन के पेटी मिलेगी,परीक्छा में पास हो जाओगे.अइसे कथें जानो मानो उही मन ह भगवान ल बिसा डारे हें.
में अइसन मेसेज ल बड़ सेयर करथँव अउ में तो कइथँव. अइसे मेसेज तो हर मनखे करा भेजे जाना चाही.कम से कम धन के पेटी मिले म देस के गरीबी तो एको कनि कम हो जही.
फेस बुक के बारे म का कहँव.ओ म तो दिन भर
जवान-जवान टुरा-टुरी के फोटोच ह छाय रथय.टिप टाप कपड़ा पहिरे,आपन मुहु ल बेंदरा-बेंदरी खरिख चिक्कन,अउ ओंठ ल सुरा जइसे गोल-गोल बनाके खालहे म लिखे रइथें में ह कइसे दिखत हँव?लाइक,कमेंट अउ सेयर करो प्लीज.अरे नोनी बाबू हो!कभु तुमन अपन थोथना ल दरपन म नी देखव का? तुमन ह कइसे दिखत हव हमन ए बताय के ठेका लेय हन का?
कइ झन चलाक टुरा मन टुरी के नाँव,अउ फोटो ल अपन परोफाइल म डाले रहिथें.ए म बड़ फायदा हे.अइसे करे में टुरी मनके तीर जाय के सुघ्घर मउका मिलथय,अउ टुरी हरे कहिके दूसर घलौ ओ ल लाइक,कमेंट सेयर करथँय.सही म ए ह बहुत बड़े कला आय भइ,जेला महु ह अभी ले नइ सीख पाय हों.
वाट्स एप फेसबुक सब टेम पास करे के साधन तो आय भई.जिनगी दू दिन के त आय.मनमाने मेसेज भेजो-चेट करो.भेजो कइने घलौ गाना,वीडियो,फोटो कि मोबइले ह हेंग हो जाय.दूसर के परिसानी ल झन बिचारव.अउ दुनिया म उही अदमी ल याद करे जथे जे दूसर के जीना हराम करथे,दूसर ल पीरा देथे.
बस लगे रहव फेसबुक वाट्सएप म.पढ़ई-लिखई,कमई-धमई अउ दाई-ददा के सेवा-जतन फेर कभु कर लुहु.कइ झिन मोबइल के सत उपयोग करथें न,तेमन उपर मोला बड़ हाँसी अथे,अरे भकवा हो अदमी होके जब तुमन अपन मनमरजी नी कर सकव त तुम्हर अदमी होय के का मतलब हे?
में तो इन्टरनेट के दुरुपयोग करहुँच.दूसर ल भरम म डालहूँ,दूसर ल पीरा दूहुँ,दूसर ल परसान करहूँ.मोला तो इही काम म बड़ मजा अथे.देखथँव कोन मई का लाल का कर लिही.
मोर तो इही कहना हे....
जिनगी मिले हे बड़ा भाग से,
जइसे जीना हे जियव.
दुनिया मरत हे मरन दे न,
बेफिक्कर खावव पियव.
✍अशोक नेताम"बस्तरिया"
📞9407914158
कोई टिप्पणी नहीं:
एक टिप्पणी भेजें