||मैं तुके बलुक नी सकलें||

हौ मया होली तुचो सँग,
जे दिन ले तुके दखलें.
मान्तर ए गोठ आउर आय,
कि मैं तुके बलुक नी सकलें.

तूय रलिस सौकारिन,
मैं गरीब माय चो लाडरा.
तुचो-मचो संग,
लागली लोग मन के अडरा.
फसाउन गेली मके,
तुचो मया चो फांदा.
मीठ तुचो गोठ इतरो,
जसन नाँगर काँदा.
तुचो असन सुँदरी नोनी,
मै कहाँय नी दखलें.
हौ मया होली तुचो सँग,
जे दिन ले तुके दखलें.
मान्तर ए गोठ आउर आय,
कि मैं तुके बलुक नी सकलें.

सोचलें हुनके बले,
मचोय ले मया आसे.
आजि तो आसे ओग्गाय,
बलेदे बे केबेय पासे.
तुचो मया ने भुलकलें मैं,
कितरोय दिन हफता आउर जोन.
पीता लागे चाहा मके,
साग ने नी लागे नोन.
तुचो सुरता ने मैं,
कएक रात नी सोवलें.
हाँ मया होली तुचो सँग,
जे दिन ले तुके दखलें.
मान्तर ए गोठ आउर आय,
कि मैं तुके बलुक नी सकलें.

मान्तर भूँय आउर बादर चो,
केबय सँग दखा दयेसे.
मनुक कितरोय डगाओ,
हुन जोन के कहाँ अमरायसे.
रली हुन तो सपना,
मके हुन कहाँ मिरली.
मचो उपरे जसन,
जीवधरा बिज गिरली.
तुचो बाट दखुन-दखुन
मैं तो थकलें.
हौ मया होली तुचो सँग,
जे दिन ले तुके दखलें.
मान्तर ए गोठ आउर आय,
कि मैं तुके बलुक नी सकलें.

आज फेरे छाती में दुखा उठली,
फेर तुके काय काज रिस होएँदे.
काय मँजा भात-साग खाउन,
धरती माय चो कोरा ने सोयेंदे.
मान्तर कसन जाले आज बले मैं
भगवान असन तुचो नाव धरेन्से.
तुय तो भुलकलिस बे मके,
मान्तर मेैं तुचो सुरता करेंसे.
ओहो सुरता चो धार ने बोहुन,
मैं ए काय काय बललें.
हौ मया होली तुचो सँग,
जे दिन ले तुके दखलें.
मान्तर ए गोठ आउर आय,
कि मय तुके बलुक नी सकलें.

✍अशोक नेताम"बस्तरिया"
📞9407914158