कइ साल ले जरावत आथन,
आय पाप के चिन्हारी रावन.
फेर मरे नही ओ ह,
सैतान बन गेहे हमर मन.
पइसा रइथे त पूछन नहीं कोनो ल,
चलथन अपन छाती ल फुलाके.
धरमारम के चिंता नइ हे,
रहि जथन पापकरम म भुलाके.
परनिंदा-चोरी-लबारी,
परनारी दरसन करथन.
क्रोध-इरसा के भीसन अगिन म,
हमन खुदे जरथन.
सत-असत सूझय नहीं,
भरे हे हिरदय म हमर अग्यान.
जम्मो चीज ल छोड़ जाबो,
तभो ले हमन करथन अभिमान.
आज जम्मो मिलके अपन,
भीतरी के राक्छस ल मारन.
सेवा-धरम ल अपनायके,
जिनगी ल अपन सँवारन.
✍अशोक नेताम "बस्तरिया"
कोई टिप्पणी नहीं:
एक टिप्पणी भेजें