तोला पाए बर मे का-का नी करेंव.
हाय में तोर मया के आगी म जरेंव.
कभु कटवाएँव चूँदी ल,
साहरुख खान जइसन.
बनेंव कभू जैकी चैन,
कभू बनेंव माइकल जेक्सन.
हाँस हाँस के थोथना ला,
दरपन मा कई घाँव देखेंव.
हेरी पाटर सरिख,
गोल गोल चस्मा लगायेंव.
आ जावय भले दारा सिंग,
काखरो से में नी डरेंव.
तोला पाए बर मे का-का नी करेंव.
हाय में तोर मया के आगी म जरेंव.
स्नो-पावडर,फेरिन लवली,
गाल मा चुपरेंव.
बरन-बरन के क्लोज अप,
फोटो खिचाएँव.
पढ़इ लिखइ म तो,
रहँव में एकदम जीरो.
फेर तोला हिरवइन,
अउ अपन ला में समझँव हीरो.
तोरेच खातिर टूरी में ह,
रँग-रँग के कपड़ा पहिरेंव.
तोला पाए बर मे का-का नी करेंव.
हाय में तोर मया के आगी म जरेंव.
तोर खातिर छाती मोर,
करय धुकुर-धुकुर.
तोर पाछु अइसे गिंजरेंव,
जइसे गिंजरथे गली के कुकुर.
रात-दिन तें मोर,
सपना म आवस वो.
लउठी धरके कुदावँव,
लबले तें नी जावस वो.
तें बन गे मास्टरीन अउ
में जुच्छा ठेंगा ल धरेंव.
तोला पाए बर मे का-का नी करेंव.
हाय में तोर मया के आगी म जरेंव
रचनाकार:-अशोक "बस्तरिया"
✍kerawahiakn86@gmail.com
📞9407914158
कोई टिप्पणी नहीं:
एक टिप्पणी भेजें